واحد بيسأل هل توزيع العشور يتطلب حكمة من المعطي بمعنى يفحص من يستحق أو من لا يستحق؟

سؤال:

واحد بيسأل: هل توزيع العشور يتطلب حكمة من المعطي بمعنى يفحص من يستحق أو من لا يستحق أو يقدمها للكنيسة لتتولى هذا الأمر نيابةً عنه؟ ولا يعتبر هذا سلبية؟ ^[1]

الإجابة:

هو طبعًا العطاء مفروض يكون بحكمة، بل كل فضيلة من الفضائل مفروض تكون ممتزجة بالحكمة لئلا الفلوس بتاعت ربنا اللي بتدفعها في العشور بدال ما تروح للمحتاجين تروح للمحتالين.

وكتير من المحتاجين بيخجلوا وييجوا بينما المحتالين بيلّحوا وبيجيبوا أسباب وبيخترعوا حاجات، وممكن يعني زي واحد مرة أعرفه كان في الإسكندرية بييجي يطلب معونة كل شوية والتانية؛ أهو الراجل ده أمه تموت 3 مرات كل سنة، ومراته تحبل 4 مرات في السنة، وييجي يقول أمي ماتت وأبويا مات، وكل شوية والتانية بتموت له أم وبيموت له أب والحكاية ماشية.

بيعتمد على إن الناس بينسوا أو هو بينسى، فاللي زي ده يبقى إحنا بنشجعه على الكدب والاحتيال، مفروض هؤلاء الناس تُفحص الحالة بتاعتهم فحص كويس وننقذهم من الكدب والاحتيال وإذا كانوا محتاجين نديهم، والأمر ده تقدر تعمله الكنيسة أكتر منك.

أنت لما بتدفع للكنيسة، الكنيسة بتقدر تفحص الحالات، لكن ليس معنى كده إن لو حد طلب منك بصفة شخصية ما تديهوش، لأن الكتاب بيقول: “مَن طلب مِنْكَ فَلاَ تَرُدَّهُ” (مت5: 42) بس برضو بحكمة.

^{[1] سؤال أجاب عنه قداسة البابا شنوده في عظة بعنوان “مخافة الله ومحبته” بتاريخ 3 يونيو 1992م}