أسئلة اللاهوت الروحي

سؤال ما هو علاج الإدانة بالفِكر باستمرار والأفكار الشريرة؟

سؤال:

ما هو علاج الإدانة بالفِكر باستمرار والأفكار الشريرة؟ ^[1]

الإجابة:

في كتاب الحروب الروحية أنا كاتب باب طويل عن الأفكار ومقاومتها. لكن بالنسبة للإدانة بالفِكر، حاول من الناحية الإيجابية إنك تشغِل فِكرك بشيء مُفيد. طول ما فِكرك فاضي، هتيجي الأفكار الخاطئة تعشِش فيه. اشغل نفسك بالقراءة، بالفِكر الصالح، بالمُناقشات الكويسة، بالتأمل، يعني خلي أفكارك تكون أفكار إيجابيًا كويسة. لما يجيلك فِكر إدانة، فَكر في خطاياك، قول أنا أيضًا خاطئ وبعمل وبسوي وجايز تكون ليك خطايا أصعب من إللي بتدين عليها. أو لو جالك فِكر إدانة في واحد صلي من أجله، قول يا رب أنقذه. كمان الأشخاص إللي دايمًا تدينهم بفِكرك، بلاش تفِكر فيهم كتير. يعني ساعات يكونوا أشخاص اسودت صورتهم في نظرك ومش قادر تجيب لها كوريكتور ولا تضيع السواد إللي فيه. فإللي زي دول ماتفِكرش فيهم كتير، خليهم في حالهم، قول وأنا مالي خليني في حالي، وأنا مالي خليني في حالي. القديس يوحنا القصير كان لما يجيله فِكر إدانة في واحد أو يشوف واحد أخطأ، كان يبكي ويقول خطية هذا الإنسان دليل على إن الشيطان نَشيط. وما دام الشيطان نَشيط ووقع أخويا النهارده، جايز يوقعني أنا بُكره وجايز الجدع ده إللي أخطأ يقوم وأنا ما أقومشِ، فيصلي من أجله.

 

^{[1] سؤال أجاب عنه قداسة البابا شنوده في عظة بعنوان ” أبواب دخلها السيد المسيح لكي يوصلنا للفداء” بتاريخ 24 يناير 1990م}