أسئلة اللاهوت الرعوي

سؤال من طفل هل الواحد لو أتفرج على الكرة حرام؟

سؤال

بيسأله ولد صغير، بيقول: هل الواحد لما يتفَرَّج على الكورة حرام؟ وإذا كان حرام، فأنا دايمًا بأحب أَتفَرَّج على الكورة، فما رأيك؟ وأنا بأحضر كنيسة واجتماعات؟. ^[1]

الإجابة:

طبعًا مش حرام إنك تِتفَرَّج على كورة، لكن الحرام إنك إنت تضَيَّع وقتك في الكورة. فيه فرق بين واحد يتفَرَّج وبين واحد يضَيَّع وقته. فإذا كنت بتِتفَرَّج بدون ما بتضَيَّع وقتك، يعني مرة كل كام شهر، ومش في مواعيد المذاكرة، ما جراش حاجة. لكن تعُد تَتَتَبَّع الماتشات وتشوف مين إللي هياخد الدَوري، ومين إللي هياخد الكاس، ومين إللي هيسافر برَّة، ومين ومين إللي هيرجع؛ دي طبعًا حاجة هتضَيَّع وقتك، فاحنا مش عايزين إنك إنت تضَيَّع وقتك.

ومش بس بتقول: بأحضر كنيسة واجتماعات، وإنما لازم كمان تكون بتذاكر دروسك، بتذاكر دروسك وبتأَدِّي واجباتك، وبتنجح كويس، وبتجيب مجموع كويس، ومش مُقَصِّر في حاجة. وخَلِّي الكرة دي للأجازة الصيفية، يمكن تبقى كويسة، لكن أثناء السنة الدراسية، مش مناسب إنك تضَيَّع وقتك في حاجات زي دي.

^{[1] سؤال أجاب عنه قداسة البابا شنوده في عظة بعنوان “التجربة على الجبل” بتاريخ 29 مارس 1974م}