أسئلة أعياد ومناسبات

سؤال الصيام 55 يوم منهم 40 يوم صيام السيد المسيح، وأسبوع قبل الأربعين استعدادي هي أسبوع الآلام فما هو اليوم الـ55؟

سؤال

الصيام الكبير 55 يوم، منهم 40 يوم صيام السيد المسيح، وأسبوع قبل الأربعين استعدادي أو تَعويضي، وأسبوع بعد الأربعين، اللي هي أسبوع الآلام أو البصخة، فالمجموع 54. والسؤال: ما هو اليوم ال 55؟ ^[1]

الإجابة:

سؤال في الحساب. هأقول لك إيه اليوم ال 55 بالظبط.

اليوم الخامس والخمسين هو سبت لعازر، يعنى إيه سبت لعازر؟ يعني جمعة ختام الصوم، اللي احنا بنسَمِّيها: جمعة ختام الصوم، هي جمعة ختام الأربعين المقدسة، يعني صوم الأربعين المقدسة يبتدي يوم الجمعة، والبصخة بتبتدي بعد قداس حد الزعف، المغرب يعني، فيبقى سبت لعازر هو ده اللي في الوسط.

ما كُناش نقدر نخَلِّيه فطار، لأن مش معقول نَفصِل هذه الحلقة المُتَّصِلة بتاعة ال 55 يوم عشان سبت لعازر، فدخل في الوسط، دخل في الوسط، كمقدمة للبصخة أو لكي يربط الحلقتين مع بعض.

هو يوم سبت لعازر، اللي هو السبت اللي بعد جمعة ختام الصوم وقبل حد الزعف، يوم السبت اللي قبل حد الزعف هو ده اليوم الخامس والخمسين.

معلش يا ابني، اللي خَلَّاك تصوم 54، يعني ما جاتش من يوم، بسيطة.

^{[1]  سؤال أجاب عنه قداسة البابا شنوده في عظة بعنوان “التجربة على الجبل” بتاريخ 29 مارس 1974م}