سؤال واحد بيقول متى تنزل الروح في الإنسان؟

سؤال:

واحد بيقول متى تنزل الروح في الإنسان؟ – هي بتنزل؟ يعني نفس السؤال غلط بتنزل منين؟ – هل في بداية خلقه أو بعد أربعين يوم؟ واختلف آراء البعض… ^[1]

الإجابة:

لأ يا ابني شوف، الناس إللي بيقولوا ممكن تنزل الروح في الإنسان بعد أربعين يوم، يقعون في عدة أخطاء من ضمنها إن الروح ديه إللي بتنزل روح ليست بشرية دي جات منين؟ روح إيه ليست بشرية جات منين؟

تاني حاجة إن هذه الروح إللي تنزل يبقى لم ترث الخطية الجدية أو الخطية الأصلية، ويبقى زي ما القديس أغسطينوس اختلف مع القديس جيروم في هذا الموضوع وقال له: إذا كانت الروح دي مخلوقة وبتنزل يبقى لم ترث الخطية، فلماذا إذًا نعمد الأطفال وأرواحهم بريئة؟

كمان إللي بيقعوا في هذه البدعة التي هي “خلق الروح ونزولها” بعضهم بيكون جايبها من ال Reincarnation يعني عودة الروح يقول لك: روح جات من إنسان دخلت في إنسان، ونزلت من إنسان دخلت في حيوان، وجات من حيوان ودخلت تجوال الروح وعودة التجسد. وبعضهم أيضًا لما يجي يقول لك: الروح تنزل بعد أربعين يوم، يبقى لو المرأة اجهضت نفسها قبل الأربعين يوم يبقى مفيش إنسان مات دول شوية دم ومفيش روح دخلتهم، وهكذا ممكن أن يبيحوا الإجهاض الذي لا توافق عليه لا التعاليم السماوية ولا القوانين المدنية حتى.

فمافيش حاجة اسمها تنزل، الإنسان بيولد من والديه بنفس الطبيعة جسدًا ونفسًا وروحًا من أول يوم، الجنين لما بيتكون الجنين بيكون على نفس طبيعة والديه، وبصفة أن طبيعة والديه الروح والجسد يبقى لازم يكون كدا لكن تنزل وما تنزلشي مفيش حد قال الكلام ده أبدًا.    

^{[1] سؤال أجاب عنه قداسة البابا شنوده في عظة بعنوان “أنا الأول والآخر” بتاريخ 18 مارس 1992م}