أسئلة اللاهوت الروحي

سؤال هل لو كان المريض صائم ثم أخذ الدواء يبطل مفعول الصيام؟

سؤال

هل لو كان المريض صائم ثم أخذ الدواء يُبطِل هذا مَفعول الصيام في حالة تَصميمُه على الصيام؟ ^[1]

الإجابة:

أنا عايز الدين لا نأخذه بطريقة حَرفِيَّة، اللي بياخد الدوا ما بيكسَرش الصيام لأنه مش بياخد الدوا علشان يتنَعَّم بأكل أو شُرب أو يُغَذِّى جسده، لا، ده بياخد الدوا وجايز الدوا يكون مُر وجايز يكون طعمُه وِحِش، فده ما يكسرش الصيام.

إلا لو الإنسان حَب يغالِط ربنا، يعني إيه يغالِط ربنا؟ يعني مثلًا هياخد قرص تكَفِّيه معلقة مَيَّة، قوم يروح شارب لها كوباية بحالها، وبالمَرَّة، فده بيبقى مش بياخد دوا، هو بيحاول يغِش ربنا في أَخد الدوا، لكن إذا كان الدوا مجرد دوا، ما يكسرش صيام.

واحنا في الصيام لا نَقصِد إهلاك الجسد وإنما نقصد إن احنا نُهَذِّب شهوات الجسد، لأن بولس الرسول قال: “أُخضِع جسدي وأستَعبِدُه”، ما قالش: أقتل جسدي، أَمَوِّت جسدي، لا، قال: أُخضِع جسدي وأستَعبِدُه، وفي نفس الوقت قال: “أُقيت جسدي وأُرَبِّيه”، فأخد الدواء ده ما ما بيأَثَّرش.

^{[1] سؤال أجاب عنه قداسة البابا شنوده في عظة بعنوان ” الحواس” السمع وأخطاؤه والأذن بين الروحانية والانحراف” بتاريخ 8 مارس 1974م}