سؤال هل إن أجتمع ٣ كهنة علي رِسامة أسقُف لوجب ذَلك كما حدث أيام الإسكافي بعد استِشهاد مارِمرقس؟

سؤال:

 واحد بيقول سَمعت من بعض الآباء الكهنة إن لو اجتمع (٣) ثلاثة كهنة على رِسامة أسقُف لوجب ذَلك كما حدث أيام الإسكافي بعد استِشهاد مارِ مرقس؟ ^[1]

الإجابة:

 يا ابني إللي سمعته ده غلط، إزاى لو اجتمع (3) ثلاثة كهنة؟ طب إيه رأيك إن مثلًا بعض إيبارشيات فيها 60 كاهن، يبقي لو كل (3) ثلاثة اجتمعوا على رِسامة كهنة يبقى يجِب ويبقى نرسِم لهم 20 أسقُف؟ دي عمليًا تمُر إزاي؟ زمان أيام مارِ مرقس ماكنش فيه غير هذا العدد بس، هما دول إللي كانوا مرسومين أيام مارِ مرقس. فكان ده كل الكهنوت الموجود لكن أيامنا دلوقتي عدد كبير، فدي أول نقطة.

لو اجتمعوا ثلاثة، طب أفرض كل ثلاثة اختاروا لهم واحد ودول يجِب يجِب يجِب يجِب، يبقى نرسِم 20 أسقُف؟

نقطة تاني، طب والشعب (3) ثلاثة قُسس يعملوا أسقف والشعب مالوش رأي؟ الناس إللي بيقولوا لك الكلام ده ناس يعني مَابيدوكشِ حقيقة مظبوطة لأ.

وبعدين بيقول كمان سِمع إن هل كاهن يرسِم كاهن؟

دا الحكاية خرفت خالص يعني، الكاهن مايقدرشِ يرسِم ولا أُغنُسطس حتى، الرسامات هي من عَمل الأساقفة فقط.

^{[1] سؤال أجاب عنه قداسة البابا شنوده في عظة بعنوان “معالم الطريق الروحي – القوة الحقيقية في المسيحية” بتاريخ 14 فبراير 1990م}