اسئلة لاهوت عقيدي

سؤال قُلتم قداستكم من قبل إن المسيحية لا تعترف بتناسخ الأرواح فكيف إذًا نفهم إن يوحنا هو إيليا؟

سؤال:

 واحد بيقول: “قُلتم قداستكم من قبل إن المسيحية لا تعترف بتناسخ الأرواح، فكيف إذًا نفهم إن يوحنا هو إيليا؟ ^[1]

الإجابة:

 لأ، يوحنا مش هو إيليا! اللي قال لك الكلام ده يبقى مش فاهم معنى إن يوحنا يأتي بروح إيليا، “يوحنا يأتي بروح إيليا يعني بأسلوب إيليا، بطريقة إيليا. يعني إيليا كان رجلًا ناسكًا ويوحنا كان رجلًا ناسكًا، ده كان بيلبس وبر إبل ومنطقة على حقويه والتاني كذلك، يوحنا كان بيسكن الجبال وإيليا كان بيسكن الجبال، إيليا بَكَّتَ ملكًا هو أخآب ويوحنا بَكَّتَ ملكًا هو هيرودس، يوحنا كان يتميز بالشجاعة وبالجرأة تمامًا مثلما كان إيليا يتميز بالشجاعة والجرأة.

 آدي معناها “أتى بروح إيليا”. فكلمة “روحه” مش معناها نفس روحه يعني، يعني أسلوبه. بدليل إن أليشع النبي طلب من إيليا أن يعطيه اثنين من روحه، ده يدّي له اتنين من روحه إزاي بقى؟! قطط؟! لأ! القطط ملهاش أكتر من روح بس يعني الناس بيقولوا كده العوام! فمش معقولة بيدّي له اتنين من روحه، وإنما يقصد إن بنفس قوته يدّي له قوة مضاعفة، بنفس معجزاته يدّي له معجزات مضاعفة، بنفس أسلوبه.

^{[1] سؤال أجاب عنه قداسة البابا شنوده في عظة بعنوان “الجدية في الحياة الروحية ج1” بتاريخ 22 يوليو 1987م}