أسئلة اللاهوت الروحي

سؤال أنا مش عارف أصلي أشعر بالفتور في الصلاة ماذا أفعل؟

سؤال:

واحد بيقول أنا مش عارف أصلي، بيقول أنا مش عارف أصلي. أصلي ولكن أحس بفتور في صلاتي بالرغم من إني أحب السيد المسيح جدًا. وبعد ما أجي أنام أجد نفسي عايز أبكي، وعايز أصلي تاني، وأحس إني عايز أخاطب الله مرة أخرى، ولكن عند الصلاة يعاودني نفس الشعور بالفتور؟ ^[1]

الإجابة:

شوف يا حبيبي، أنت بتحب ربنا وبتصلي كويس وليك اشتياق لربنا بس ممكن الشيطان يُحاربك.

كل ما الشيطان يجد صلاة ناجحة، يحاول أن يُحاربها، فماتتضايقش أبدًا. إنسان كل ما ينام يجد نفسه عايز يبكي، وعايز يصلي تاني، وعايز يخاطب ربنا يعني معناها عنده محبة لله، وعنده رغبة في الصلاة. بس كل ما يصلي الشيطان يحاول يشتت أفكاره، القديس مارِ أوغريس قال كلمة لطيفة جدًا قال: “إذا دخلت للصلاة الروحانية، فاستعد لكل ما يأتي عليك”، يعني فيه حاجة في الروحيات اسمها حسد الشياطين.

كل ما الشيطان يجدك عايز تسلُك في طريق الروح، يبتدي يحاربك. فأنت إذا صليت وشعرت بفتور، علاجها التغصب. اغصب نفسك على الصلاة زي ما قال مارِ إسحاق السريانى، قال: “اغصب نفسك على صلاة الليل وزِدها مزامير”، يعني كل ما تلاقي ليك نفس تنام ومش عايز تصلي، زود الصلاة أكتر.

جايز في الأول تبدأ بالتغصب وبعدين تجد العزاء الداخلي ابتدي يجي لك.

وكمان حاجة تاني أقولهالك إن الفضائل لا تأتي مرة واحدة للكمال. فجايز تصلي وتلاقي فتور، زي بعضه، اثبُت في الصلاة فيزول منك الفتور. على رأي واحد قال: “كيف أتعلم الصلاة؟” فكانت الإجابة: “بالصلاة”، تتعلم الصلاة بالصلاة. كل ما تصلي، تاخد خبرة في الصلاة، تعرف كيف تُخاطب ربنا، يكون لك الشعور الروحي، النعمة تفتقدك، تجد الروح القدس يشتغل فيك، تجد صلواتك ابتدت تبقى صلاة روحانية. بردو أنت لا تبدأ بالكمال، ابدأ بأي طريقة ولو بطريقة ضعيفة، هيجي وقت تنمو قليلًا قليلًا لغاية لما تصل. أما الفتور الروحي وأسبابه فيه مقالة كبيرة – طبعًا مافيش وقت لديِ – أنا كتبتها عن الفتور الروحي في كتاب الحروب الروحية ممكن تقرأها.

 

^{[1] سؤال أجاب عنه قداسة البابا شنوده في عظة بعنوان ” يجرح ويعصب يسحق ويداه تشفيان” بتاريخ 11 نوفمبر 1987م}